ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានថ្លែងថា ពុំមានអ្នកណាម្នាក់មានគំនិតអាក្រក់ក្នុងការរារាំងសម្ដេចមិនឱ្យចូលប្រជុំ G20 និង APEC នោះទេ។ 

ថ្លែងក្នុងសារសំឡេងពិសេសពីផ្ទះនៅទីក្រុងតាខ្មៅ ក្នុងខេត្តកណ្ដាល នៅយប់ថ្ងៃទី១៥ ខែវិច្ឆិកានេះ សម្ដេចតេជោ ហ៊ុន សែន បានថ្លែងថា សម្ដេចបានឆ្លងជំងឺកូវីដ-១៩ ពិតប្រាកដនិងស្នើកុំឱ្យមានការវិភាគណាមួយបែបនេះ។ 

សម្ដេចតេជោថា៖ «ខ្ញុំព្រះករុណាខ្ញុំសុំស្នើឱ្យបំបាត់ចោលនូវការភ័ន្តច្រលំ ឬក៏ការវិភាគណាដែលនាំទៅដល់ផ្លូវនេះតែម្ដង»។

សម្ដេចតេជោ ហ៊ុន សែន បានបញ្ជាក់ថាប្រធាន G20 ឆ្នាំនេះគឺប្រធានាធិបតីឥណ្ឌូនេស៊ីលោក ចូកូ វីដូដូ ផ្ទាល់ចង់ឱ្យសម្ដេចតេជោមានវត្តមានក្នុងកិច្ចប្រជុំនេះ ខណៈថៃលោក ប្រាយុទ្ធ ចាន់អូចា ក៏ដូចគ្នា ខណៈមេដឹកនាំប្រទេសទាំងពីរបានរៀបចំឱ្យសម្ដេចឡើងថ្លែងសុន្ទរកថា និងជំនួបជាមួយប្រធានាធិបតីនៃប្រទេសមហាអំណាចផងដែរ។ 

គួរឱ្យដឹងថាតាមគម្រោងសម្ដេចតេជោ ហ៊ុន សែន នឹងត្រូវឡើងថ្លែងបទអន្តរាគមន៍ចំនួន២ នៅក្នុងកិច្ចប្រជុំ G20 ស្តីពីសន្តិសុខស្បៀងនិងថាមពល និងសម័យប្រជុំទី២ ស្តីពីបញ្ហាសុខភាព ដែលនឹងសង្កត់ធ្ងន់លើសារសំខាន់នៃពហុភាគី និយម និងកិច្ចសហការគ្នាឆ្ពោះទៅរកគោលដៅនៃការស្តារឡើងវិញប្រកបដោយចីរភាពក្រោយជំងឺរាតត្បាត Covid-19 ខណៈនៅប្រទេសថៃសម្ដេចក៏ត្រូវបានរៀបចំឱ្យមានជំនួបជាមួយប្រធានាធិបតីចិនលោក ស៊ី ជិនពីង និងប្រធានាធិបតីបារាំង លោក ម៉ាក្រុង ផងដែរ។ 

គួរឱ្យដឹងផងដែរថាសម្ដេចតេជោត្រូវបានក្រុមគ្រូពេទ្យនៃប្រទេសឥណ្ឌូនេស៊ីបានរកឃើញថាមានផ្ទុកវិជ្ជមានជំងឺកូវីដ-១៩ កាលពីព្រឹកថ្ងៃទី១៥ ខែវិច្ឆិកា ឆ្នាំ២០២២នេះ។ 

ទោះជាយ៉ាងណាសម្ដេចតេជោបញ្ជាក់ថាស្ថានភាពរបស់សម្ដេចគឺធម្មតា ពុំមានរោគសញ្ញា ឬក៏សញ្ញាណាមួយនៃជំងឺនេះនោះទេ ហើយសម្ដេចនៅតែរក្សាការងារជាប្រក្រតីលើកលែងតែជួបភ្ញៀវប៉ុណ្ណោះ៕